Af hverju pysjueftirlit?
Með skráningu og vigtun þeirra pysja sem bjargað er árlega má meta varpárangur lundastofnsins í Eyjum og spá fyrir um nýliðun í varpstofninum, stærð árganga og fæðuframboðs í sjónum. Við hvetjum alla til að taka þátt í þessu verkefni og hjálpa okkur við að fylgjast með lundastofninum. Þitt framlag skiptir miklu máli.
Hvernig á að skrá upplýsingarnar?
Skráið upplýsingar um pysjurnar aftan á pysjueftirlitsbæklinginn eða prentið út þetta eyðublað. Þegar allar pysjur hafa verið skráðar þá er hægt að slá upplýsingarnar inn hérna á þessari síðu eða skila blöðunum til Sparisjóðsins, Rannsóknarsetursins eða Náttúrugripa- og fiskasafnsins.
Hvað á að skrá?
- Heildarfjölda pysja sem er bjargað á hverri nóttu.
- Dagsetningu og tíma. Notið dagsetningu kvöldsins sem leiðangurinn hefst og haldið þeirri dagsetningu þrátt fyrir að nýr dagur hefjist á miðnætti!
- Þyngd á öllum pysjum sem þú veiðir á nóttu.
- Veðurfar
Við hvetjum alla til að koma með pysjurnar á Náttúrugripa- og fiskasafnið milli kl. 14:00 og 15:00 svo hægt sé að vigta þær og mæla. Einnig er hægt er að nota vigtina við Náttúrugripa- og fiskasafnið og vigta strax um nóttina.
Hver pysja skiptir máli og því er mikilvægt að skrá allar þær pysjur sem veiðast.
